Shugaban ƙasar Iran, Masoud Pezeshkian, ya fitar da kakkausar gargaɗi ga duk wata ƙasa da ta iya tunanin kai wa Jagoran Addinin Iran, Ayatollah Ali Khamenei, hari, yana mai cewa hakan zai zama tamkar ayyana gagarumin yaƙi a kan ƙasar Iran baki ɗaya.
Wannan bayani ya zo ne a daidai lokacin da ake ci gaba da takaddama mai zafi tsakanin Tehran da Washington, musamman kan zanga-zangar cikin gida da matsin lambar takunkumai. Pezeshkian ya zargi Amurka da ƙawayenta da jefa al’ummar Iran cikin wahala ta hanyar takunkumai da suka ɗauki shekaru suna ƙaƙaba wa ƙasar.
Shugaba Pezeshkian ya bayyana cewa duk wani hari kan Khamenei zai jawo yaƙi kai tsaye da Iran. Ya kuma danganta tabarbarewar tattalin arziki da wahalar da jama’a ke ciki da takunkuman da Amurka da ƙawayenta suka sanya, yana mai cewa wannan tsantsar ƙiyayya ce da rashin adalci ga al’ummar Iran.
