Hukumar Ba da Agajin Gaggawa ta Nijeriya (NEMA) ta karɓi ‘yan ƙasar 708 da suka maƙale a Jamhuriyar Nijar, inda aka kwaso su daga birnin Niamey zuwa filin jirgin sama na Malam Aminu Kano. Da isowarsu, jami’an gwamnati sun tarbe su tare da yin rajista da tantancewa domin tabbatar da lafiyarsu da bukatunsu.
A cewar Shugaban Ayyuka na NEMA a Kano, Dakta Nura Abdullahi, mutanen sun haɗa da maza da yara 292 da kuma mata da yara 416 daga jihohi daban-daban. Ya bayyana cewa Ma’aikatar Harkokin Waje ta Tarayya ce ta jagoranci aikin dawo da su, inda aka tanadar musu da abinci, matsuguni na wucin-gadi da sauran kayan agaji na gaggawa.
Hukumar ta kuma raba musu kayayyaki irin su barguna, gidajen sauro da kayan tsafta, yayin da Ƙungiyar Agaji ta Nigerian Red Cross Society ta kula da marasa lafiya, tare da tura masu buƙatar kulawa ta musamman zuwa asibitoci. A nasa jawabin, Abdullahi ya gargadi matasa da su guji hijira mai haɗari ba tare da tsari ba.
A nata bangaren, Hajiya Luba Liman daga hukumar kula da ‘yan gudun hijira da ‘yan cirani ta ƙasa ta ce dawowar mutanen ta kasance bisa son ransu, inda gwamnati ta taimaka musu saboda rashin kuɗin dawowa. Ta jaddada cewa wannan aiki ya samu haɗin gwiwa daga hukumomi da dama, ciki har da ofishin jakadancin Nijeriya a Niamey.
Majiyar Labari: TRT HAUSA
