Oxford English Dictionary (OED) ta ƙara wasu kalmomin asalin Nijeriya a cikin kundinta na ƙarshe, matakin da ke nuna karuwar tasirin harshen da al’adun ƙasar a matakin duniya. A sabuntawar Disamba 2025, OED ta shigar da kalmomi sama da 500 sabbi, ciki har da “mammy market”, “amala”, da wasu da suka samo asali daga Nijeriya.
Daga cikin kalmomin da aka ƙara akwai “moi moi”, “abeg”, “biko” da “Ghana Must Go”, yayin da aka kuma sabunta bayanan sama da kalmomi 1,000 da suka riga suna cikin ƙamus ɗin. Editocin OED sun ce sun duba tarihin kalmomi irin su “troll”, “coffee” da “snooker”, tare da ƙara kalmomi daga nau’o’in Ingilishi daban-daban a duniya, ciki har da na Afirka ta Yamma.
Ƙamus ɗin ya bayyana “abeg” a matsayin kalmar roƙo ko nuna mamaki, yayin da “biko” — wadda ta fito daga harshen Igbo — ke nufin “don Allah” ko roƙo cikin ladabi. An kuma bayyana “nyash” a matsayin bayan mutum, musamman mace.
A bangaren al’adu da abinci, OED ta ayyana “mammy market” a matsayin kasuwa da mata ke jagoranta, wadda ta fara a barikin soja kafin ta bazu zuwa sansanonin NYSC da makarantu. “Amala” kuwa an bayyana ta a matsayin abincin gargajiya da ake yi da garin doya ko rogo, yayin da “moi moi” aka bayyana a matsayin abincin wake na gargajiyar Yarabawa.
Haka kuma, kalmar “Ghana Must Go” ta samu bayani a matsayin babban jakar roba mai launuka, wadda sunanta ya samo asali daga korar ‘yan Ghana daga Nijeriya a 1983.
OED ta ce wannan sabuntawa na nuna yadda Ingilishi na Nijeriya, Pidgin da kalmomin titi ke ƙara shafar harshe a duniya. A shekarun baya, an riga an ƙara kalmomi irin su “japa”, “suya”, “naija”, “danfo” da “okada”, tare da wasu kalmomin Afirka daga ƙasashe daban-daban.
