Wani rahoto daga gidan talabijin na Falasɗinu ya bayyana zargin cewa sojojin Isra’ila sun azabtar da wani yaro ɗan kimanin shekara ɗaya a tsakiyar Gaza domin matsa wa mahaifinsa lamba yayin bincike. An nuna bidiyon raunukan yaron, mai suna Karim, bayan an kama shi a kusa da sansanin ‘yan gudun hijira na Al-Maghazi.
A cewar shaidu, mahaifin yaron, Osama Abu Nassar, ya tsinci kansa cikin wannan hali ne yayin da yake tare da ɗansa, inda aka tsayar da su a lokacin rikici a yankin. Rahotanni sun ce an tilasta masa barin ɗansa a wurin yayin da aka kai shi wurin binciken soja domin yi masa tambayoyi.
Rahoton likitoci ya nuna cewa yaron ya samu munanan raunuka, ciki har da ƙuna daga sigari da kuma raunukan da aka ce sun samo asali ne daga wasu abubuwa masu kaifi a ƙafarsa. Bayan kusan awanni 10, an sako yaron tare da mayar da shi ga iyalinsa ta hannun kungiyar Red Cross, yayin da mahaifin ke ci gaba da zama a tsare.
Iyalin sun yi kira ga ƙungiyoyin ƙasa da ƙasa da su shiga tsakani domin tabbatar da sakin mahaifin da kuma kare lafiyar fararen hula a yankin. Lamarin ya sake jaddada irin wahalhalun da fararen hula ke fuskanta a tsakiyar rikicin Gaza.
