Turkiyya tare da wasu ƙasashe bakwai sun bayyana matsin lamba ga Isra’ila da ta gaggauta ɗage takunkumin hana shigar da kayan tallafi zuwa Zirin Gaza, inda suka nuna damuwa kan tsananin halin jinƙai da al’ummar yankin ke fuskanta, musamman yayin da mummunan yanayi da ruwan sama da guguwar sanyi ke ƙara ta’azzara rayuwar fararen hula. A cikin wata sanarwa ta haɗin gwiwa da suka fitar a ranar Juma’a, ministocin harkokin wajen Turkiyya, Masar, Jordan, Hadaddiyar Daular Larabawa, Indonesia, Pakistan, Saudiyya da Qatar sun jaddada cewa takunkumin ya ƙara tsananta ƙarancin kayan agaji da ake buƙata don ceton rayuka.
Sun bayyana cewa yanayin ya zama mafi muni ga kusan mutum miliyan 1.9 da suka rasa matsuguni, inda suke rayuwa a wuraren da ba su da isasshen kariya daga sanyi da ruwan sama. Ƙasashen sun yaba da ƙoƙarin Majalisar Dinkin Duniya, musamman hukumar UNRWA, da sauran kungiyoyin agaji na ƙasa da ƙasa da ke cigaba da aiki duk da mawuyacin hali. Haka kuma sun bukaci Isra’ila ta bai wa ƙungiyoyin agaji damar gudanar da aikinsu cikin ‘yanci da tsaro a Gaza da Yammacin Kogin Jordan ba tare da wata matsala ba.
Sanarwar ta kuma nanata goyon bayan su ga ƙoƙarin Majalisar Dinkin Duniya da sauran shirye-shirye na siyasa da ke ƙoƙarin samar da tsagaita wuta, kawo karshen yaƙin Gaza, da samar wa al’ummar Falasdinu rayuwa mai mutunci tare da ingantacciyar hanya zuwa cikakken ‘yancin kai. Haka nan ƙasashen sun yi ƙarin kira da a hanzarta samar da matsuguni masu ɗorewa, gyaran asibitoci da kayayyakin more rayuwa, da kuma buɗe hanyoyin taimako cikin gaggawa.
Sun kuma roƙi al’ummar duniya da su ɗauki nauyin da ya rataya a kansu na ɗabi’a da na doka, tare da matsa wa Isra’ila lamba ta ɗage takunkumin kan muhimman kayayyaki, domin a samu damar kai agaji cikin hanzari ta hannun Majalisar Dinkin Duniya da sauran hukumomin taimako.
