Rikicin da ke ƙara tsananta a Gabas ta Tsakiya na ci gaba da girgiza kasuwar man fetur ta duniya, inda Hukumar Makamashi ta Duniya (IEA) ta bayyana cewa an samu ɗaya daga cikin manyan tsaiko a tarihi wajen samar da mai.
Hukumar ta bayyana hakan ne a ranar Alhamis, kwana guda bayan ta amince da fitar da mafi yawan man fetur da aka taɓa fitarwa daga ma’ajiyarta domin taimakawa wajen daidaita kasuwar mai ta duniya.
Rahotanni sun nuna cewa ana fargabar samar da man fetur zai ragu da kimanin ganga miliyan 8 a kowace rana a watan Maris. Wannan na da alaƙa da toshe Mashigin Hormuz, wata muhimmiyar hanyar ruwa da ke Tekun Iran, bayan hare-haren sama da Amurka da Isra’ila suka kai kan Iran a ranar 28 ga Fabrairu.
Sabon rahoton wata-wata na IEA kan kasuwar mai ya nuna cewa ƙasashen Gulf na Gabas ta Tsakiya sun rage samar da mai da aƙalla ganga miliyan 10 a kowace rana. Wannan adadi ya kai kusan kashi 10 cikin ɗari na yawan man da duniya ke buƙata.
Hukumar ta yi gargadin cewa idan ba a gaggauta dawo da jigilar man fetur yadda ya kamata ba, wannan gibi a samar da mai na iya ƙara tsananta.
A cewar IEA, dakatar da haƙo man fetur a wasu yankuna na iya ɗaukar makonni ko ma watanni kafin a koma yadda ake a baya, musamman idan aka yi la’akari da matsalolin tsaro da kuma lokacin da ake buƙata domin dawo da ma’aikata, kayan aiki da sauran albarkatun da ake amfani da su.
