Mwenyekiti wa Baraza la Mpito la Sudan, Abdel Fattah al-Burhan, amesema serikali haitakubali mazungumzo ya amani wala kusitisha mapigano iwapo waasi wataendelea kuwepo katika eneo lolote la Sudan.
Akizungumza Jumapili mjini Ankara wakati wa mkutano na wanajamii wa Sudan, viongozi wa kiraia na wanahabari, al-Burhan alisema amani ya kweli inaweza kupatikana tu baada ya serikali kurejesha udhibiti kamili wa nchi.
Alisisitiza kuwa mpango wa amani uliowasilishwa na Waziri Mkuu Kamil Idris katika Umoja wa Mataifa unaakisi msimamo rasmi wa serikali na umeidhinishwa na vyombo vya juu vya uongozi wa Sudan.
Ingawa alikataa mapatano na waasi, al-Burhan alisema serikali haitamani vita virefu, akisisitiza kuwa wale waliokuwa wakishinikiza serikali kusalimu amri wanapaswa sasa kuwahimiza waasi kujisalimisha.
Kwa upande wa diplomasia ya kikanda, al-Burhan alisema Sudan ina imani na juhudi za Saudi Arabia na Misri katika kusaidia kupatikana kwa amani, na akasisitiza kuwa nchi yake haitashambulia majirani lakini itajilinda inapohitajika.
CHANZO: TRT Afrika
