Ghana inatarajiwa kupokea raia wa Afrika Magharibi 40 zaidi waliorejeshwa kutoka Marekani, ikiwa ni kundi la pili kutumwa nchini humo na utawala wa Donald Trump kama sehemu ya juhudi zake za kupambana na uhamiaji haramu.
“Ninaweza kufichua kwenu kwamba tunatarajia wengine 40 katika siku chache zijazo. Tunawachunguza kabla hawajafika,” Waziri wa Mambo ya Nje Samuel Okudzeto Ablakwa alikiambia kituo cha televisheni cha ndani Jumatano.
Rais John Dramani Mahama wiki iliyopita alisema Ghana imekubali kupokea idadi isiyojulikana ya watu waliorejeshwa baada ya Washington kuiomba nchi hiyo iwachukue “raia wa mataifa ya tatu.”
Serikali yake inasisitiza kuwa uamuzi wa kuwapokea waliorejeshwa siyo kuunga mkono sera ya uhamiaji ya Rais Trump, na nchi hiyo haipokei chochote kama fidia.
Idhini ya bunge
Wabunge wa upinzani wameishutumu serikali kwa kukwepa idhini ya bunge kuhusu makubaliano ya kurejeshwa kwa watu hao. Hata hivyo, serikali inasema makubaliano hayo yanatawaliwa na Hati ya Makubaliano (MoU) na Marekani ambayo haihitaji kupitishwa na bunge.
Waziri wa Mambo ya Nje alisema uamuzi wa Ghana uliongozwa na masuala ya kibinadamu baada ya kushuhudia hali ya watu hao nje ya nchi.
“Hatuifanyii Marekani fadhila. Tunawafanyia Waafrika wenzetu fadhila; tunawapa hifadhi, matumaini na tunataka warudi nyumbani na wajisikie huru,” Ablakwa aliambia Channel One TV.
“Ilikuwa ni kwa misingi ya kibinadamu tu; hatukupokea faida yoyote ya kifedha. Tunafanya hivi kwa sababu tunataka kuendelea kuifanya Ghana kuwa Makkah kwa Waafrika,” aliongeza.
