Mahakama ya Kimataifa ya Uhalifu (ICC) imesema imepata ushahidi wa kutosha unaoonyesha kuwa uhalifu wa kivita na uhalifu dhidi ya binadamu umefanyika katika eneo la Darfur, Sudan. Uchunguzi umebaini kuwa mifumo ya ukatili iliyoshuhudiwa El Geneina mwaka 2023 imejirudia tena Al Fasher mwaka 2025, ikiwemo matumizi ya unyanyasaji wa kijinsia kama silaha ya vita.
Naibu Mwendesha Mashtaka wa ICC, Nazhat Shameem Khan, alieleza mbele ya Baraza la Usalama la Umoja wa Mataifa kuwa ushahidi umetokana na video, sauti na data za satelaiti. Aliongeza kuwa vikosi vya Rapid Support Forces (RSF) vinadaiwa kuhusika na vitendo vya kukamata, kutesa na kuua watu kutoka makabila yasiyo ya Kiarabu.
Khan alitaja hukumu ya Oktoba 2025 dhidi ya Ali Mohammed Abdul Rahman kama hatua muhimu, kwa kuwa ndiyo ya kwanza kutokana na rufaa ya Baraza la Usalama kwa ICC na ya kwanza kwa msingi wa uhalifu wa kijinsia. Hata hivyo, alikiri changamoto za upatikanaji wa mashahidi na usalama wao, ingawa ushirikiano na nchi za Afrika na mamlaka za Sudan umeimarika.
Wakati huo huo, Khan alieleza masikitiko yake kwa kukosa visa ya Marekani, jambo lililomzuia kutoa taarifa kwa Baraza la Usalama ana kwa ana. Marekani, kupitia naibu balozi wake Jeff Bartos, ilionya kuwa itaendelea kuchukua hatua dhidi ya ICC, ikisisitiza kuwa haitaikubalia mahakama hiyo kudhoofisha mamlaka yake au ya washirika wake.
CHANZO: TRT Afrika
