Shirikisho la Soka Barani Afrika (CAF) limetangaza kuwa mshindi wa Kombe la Mataifa ya Afrika (AFCON) 2025 atapokea kitita cha dola milioni 10, hatua inayodhihirisha ongezeko kubwa la zawadi za fedha katika mashindano hayo makubwa ya soka barani Afrika.
Kwa mujibu wa Rais wa CAF, Patrice Motsepe, timu itakayofika fainali lakini ikashindwa kutwaa ubingwa itajinyakulia dola milioni 4. Kiasi hicho ni sawa na zawadi ya mshindi wa pili katika AFCON ya 2023, wakati mabingwa wa mwaka huo, Côte d’Ivoire, walipata dola milioni 7.
Katika mashindano yatakayofanyika nchini Morocco, timu zitakazofika hatua ya nusu fainali zitahakikishiwa angalau dola milioni 2.5 kila moja. Timu zitakazovuka hadi robo fainali zitapokea si chini ya dola milioni 1.3, huku zile zitakazotolewa katika hatua ya 16 bora zikipata dola 800,000 kila moja.
Kwa upande wa hatua ya makundi, timu itakayomaliza nafasi ya tatu katika kundi lake itapewa dola 700,000, wakati mataifa yatakayoshindwa kuvuka hatua hiyo yatapata dola 500,000 kila moja.
CAF imesema kuwa ongezeko la zawadi ya mshindi ni takribani asilimia 43 ikilinganishwa na mashindano yaliyopita, huku viwango vya zawadi kwa timu nyingine vikibaki karibu sawa na vile vya AFCON 2023 kulingana na hatua walizofikia.
Jumla ya timu 24 zinashiriki AFCON 2025, na CAF imetenga jumla ya dola milioni 32 kama zawadi ya fedha kwa mashindano yote.
CHANZO: TRT Afrika
