Serikali ya Marekani imetangaza kusitisha uchakatishaji wa viza za uhamiaji kwa raia kutoka mataifa 75, hatua mpya chini ya Rais Donald Trump. Wizara ya Mambo ya Nje imesema uamuzi huo unalenga kufanya tathmini upya ya taratibu za uhamiaji na kuzuia kuingia kwa wageni wanaoweza kutegemea misaada ya umma.
Msemaji wa wizara, Tommy Pigott, alisema hatua hiyo inalenga “kukomesha matumizi mabaya ya mfumo wa uhamiaji wa Marekani.” Kwa mujibu wa Ikulu ya White House, nchi zilizoathiriwa ni pamoja na Somalia, Urusi, Iran, Misri, Brazil na Thailand, ingawa orodha kamili haijatangazwa rasmi.
Tangu kurejea madarakani, Trump ameendeleza sera kali za kupunguza uhamiaji, akifuta zaidi ya viza 100,000 ndani ya mwaka mmoja. Wizara ya Mambo ya Ndani imeripoti kufukuzwa kwa zaidi ya watu 605,000, huku wengine milioni 2.5 wakiondoka kwa hiari.
Hatua hii haihusishi viza za watalii, biashara na aina nyingine, ikiwemo zile za mashabiki wa soka wanaotarajia kusafiri Marekani kwa ajili ya Kombe la Dunia. Hata hivyo, serikali imesisitiza kuwa waombaji wote wa viza watakaguliwa kwa kina, ikiwemo historia yao ya mitandao ya kijamii.
CHANZO: TRT Afrika
