Rais wa Uturuki, Recep Tayyip Erdogan, amesema mauzo ya nje ya bidhaa za ulinzi na anga ya nchi yake yamepanda kwa kiasi kikubwa katika kipindi cha miezi 11 iliyopita, yakifikia dola za Marekani bilioni 7.45. Ongezeko hilo ni sawa na ukuaji wa asilimia 30 ikilinganishwa na kipindi kama hicho mwaka uliopita.
Akizungumza Jumamosi wakati wa sherehe ya kuidhinisha meli mpya za kivita, Erdogan alisema mafanikio hayo yameifanya Uturuki kushika nafasi ya 11 duniani miongoni mwa wauzaji wakubwa wa bidhaa za ulinzi. Alieleza kuwa miradi ya sekta ya ulinzi haijikita tu katika utengenezaji wa silaha, bali pia katika kupanua mifumo na uwezo wa ndani wa kuzalisha teknolojia ya kisasa.
Rais huyo alibainisha kuwa Uturuki ni miongoni mwa mataifa 10 pekee duniani yenye uwezo wa kubuni na kujenga meli zake za kivita. Aliongeza kuwa nchi hiyo imeanza mchakato wa ujenzi wa meli kubwa ya kubeba ndege yenye urefu wa mita 300, ambayo itakuwa kubwa zaidi kuliko TCG Anadolu.
Kwa mujibu wa Erdogan, Uturuki inaendelea kuwekeza katika miradi mbalimbali ya kuimarisha uwezo wa kujilinda dhidi ya vitisho vya ardhini, baharini, angani na katika nyanja ya mtandao, huku akisisitiza kuwa hatua zote kuanzia utafiti hadi uzalishaji wa wingi zinafanywa kwa rasilimali za ndani.
Alifafanua kuwa uwekezaji huo haulengi maandalizi ya vita, bali kulinda amani, uhuru na mustakabali wa taifa la Uturuki.
Katika hotuba hiyo, Erdogan pia alizungumzia ushirikiano wa kijeshi kati ya Uturuki na Pakistan, akieleza kuwa uhusiano wa kihistoria kati ya nchi hizo mbili unaendelea kuimarika. Alikumbusha kuwa mwaka 2018, Uturuki ilisaini mkataba wa kujenga meli nne za kivita aina ya MILGEM kwa ajili ya Jeshi la Majini la Pakistan.
Meli ya kwanza, PNS Babur, ilikabidhiwa Pakistan Mei 2024, huku meli ya pili, PNS Khaibar, ikikabidhiwa rasmi baada ya kukamilisha majaribio yote. Kwa mujibu wa ratiba, meli ya tatu, PNS Bedir, inatarajiwa kukabidhiwa mwishoni mwa Juni 2026, na ya nne, PNS Tarik, katika robo ya kwanza ya mwaka 2027.
CHANZO: TRT Afrika
