Rais wa Nigeria, Bola Ahmed Tinubu, ameagiza vyombo vya usalama kuanzisha msako mkali dhidi ya watu wenye silaha waliovamia soko katika jimbo la Niger na kuua takriban watu 50, katika tukio lililoitikisa nchi na kuzua hofu kubwa miongoni mwa wakazi wa eneo hilo.
Shambulio hilo lilitokea Jumamosi katika soko la Kasuwan Daji, kijiji cha Demo, ambapo wanamgambo waliokuwa na silaha walifyatua risasi ovyo, kuwateka raia na kupora vyakula. Baadhi ya waathiriwa wamezikwa kwa mazishi ya pamoja, huku majeruhi wakiendelea kupatiwa matibabu katika hospitali za karibu.
Kupitia taarifa rasmi, Rais Tinubu alilaani vikali ghasia hizo na kuwaagiza mawaziri na wakuu wa vyombo vya usalama kuhakikisha wahusika wanakamatwa na kufikishwa haraka mbele ya sheria. Alisisitiza kuwa hakuna atakayevumiliwa, iwe ni wahalifu au wale wanaowasaidia.
Rais pia aliagiza kuokolewa mara moja kwa wote waliotekwa nyara na kuamuru ulinzi uimarishwe katika jamii zilizo hatarini, hasa maeneo yaliyo karibu na misitu inayotumiwa na makundi ya wanamgambo kama maficho yao.
Jimbo la Niger, lililopo kaskazini-kati mwa Nigeria, limekuwa likikabiliwa na mashambulizi ya mara kwa mara kutoka kwa makundi ya uhalifu yanayofahamika kama “bandits”, ambayo huendesha utekaji nyara kwa lengo la fidia, hasa katika maeneo ya vijijini.
Serikali imesema itaendelea kuchukua hatua kali kurejesha usalama na amani katika jamii zilizoathirika, huku ikitoa wito kwa wananchi kushirikiana na vyombo vya ulinzi kwa kutoa taarifa za kiintelijensia.
CHANZO: TRT Afrika
