Serikali ya Gabon imetangaza kusimamisha kwa muda usiojulikana timu ya taifa ya soka kufuatia matokeo mabaya katika michuano ya Kombe la Mataifa ya Afrika (AFCON), ambapo timu hiyo ilipoteza mechi zote tatu za hatua ya makundi.
Kupitia tamko rasmi lililotolewa kwenye televisheni ya taifa, Waziri wa Michezo wa Gabon alithibitisha kuvunjwa kwa benchi la ufundi, kufukuzwa kwa kocha Thierry Mouyouma, pamoja na kuwaondoa kwenye kikosi wachezaji wakongwe Pierre-Emerick Aubameyang na Bruno Ecuele Manga. Hatua hiyo ilichukuliwa baada ya Gabon kumaliza nafasi ya nne katika Kundi F na kuondolewa mapema kwenye mashindano yanayoendelea nchini Morocco.
Kaimu Waziri wa Michezo, Simplice-Desire Mamboula, alisema uamuzi huo umetokana na “kiwango cha aibu” kilichoonyeshwa na timu ya taifa, hususan baada ya kipigo cha mabao 3–2 dhidi ya Côte d’Ivoire mjini Marrakech. Gabon ilikuwa tayari imeshapoteza mechi mbili za awali dhidi ya Cameroon na Msumbiji, na hivyo kukosa nafasi ya kusonga mbele.
Katika mchezo wa mwisho wa kundi, Gabon iliongoza kwa mabao 2–0 dhidi ya mabingwa watetezi Côte d’Ivoire, lakini ilishindwa kulinda uongozi huo na kuruhusu mabao matatu yaliyosababisha kipigo kingine.
Aubameyang hakushiriki katika mechi hiyo ya mwisho, akiwa amerejea Ufaransa kujiunga na klabu yake ya Olympique de Marseille kwa ajili ya matibabu ya jeraha la paja. Kupitia mtandao wa X, mshambuliaji huyo aliyewahi kushinda tuzo ya Mchezaji Bora wa Afrika alisema: “Nadhani matatizo ya timu ni makubwa zaidi kuliko mtu mmoja kama mimi.”
Kwa umri wa miaka 36, Aubameyang huenda akawa amecheza mechi yake ya mwisho kwa taifa la Gabon, hali kadhalika kwa beki mkongwe Ecuele Manga mwenye umri wa miaka 37. Uamuzi wa serikali kusimamisha timu ya taifa umeibua mjadala mpana kuhusu mipaka ya kuingilia masuala ya soka, hasa ikizingatiwa msimamo mkali wa FIFA dhidi ya uingiliaji wa serikali katika uendeshaji wa vyama vya michezo.
CHANZO: TRT Afrika
