Serikali ya Nigeria imetangaza kuwa imefanikiwa kuwaokoa wanafunzi 130 wa shule waliokuwa wametekwa nyara na watu wenye silaha katika jimbo la Niger, na hivyo kukamilisha operesheni ya uokoaji wa wanafunzi wote waliokuwa mikononi mwa watekaji.
Taarifa hiyo ilitolewa Jumapili na msemaji wa Rais, Sunday Dare, ambaye alisema kupitia mtandao wa X kwamba hakuna mwanafunzi aliyebaki matekeni baada ya uokoaji huo wa hivi karibuni. Tukio la utekaji nyara lilitokea mwishoni mwa Novemba katika shule ya bweni ya pamoja ya Kikatoliki ya St Mary’s, iliyopo katika kijiji cha Papiri, kaskazini mwa jimbo la Niger.
Awali, idadi kamili ya wanafunzi na wafanyakazi waliotekwa haikuwa wazi. Shirikisho la Wakristo la Nigeria (CAN) lilisema watu 315 walitekwa, huku takriban 50 wakifanikiwa kutoroka mara tu baada ya shambulio hilo. Serikali iliokoa karibu wanafunzi 100 mapema mwezi Desemba, kabla ya uokoaji wa kundi la mwisho la wanafunzi 130.
Chanzo cha Umoja wa Mataifa kiliarifu kuwa wanafunzi waliokolewa, wakiwemo wasichana wa shule ya sekondari, walitarajiwa kupelekwa katika mji mkuu wa jimbo la Niger, Minna, kwa ajili ya huduma za awali na ulinzi.
Tukio hili ni sehemu ya wimbi la utekaji nyara wa wanafunzi linaloendelea katika maeneo ya kaskazini mwa Nigeria, ambapo makundi yenye silaha mara kwa mara hushambulia shule kwa lengo la kupata fidia. Serikali ya Rais Bola Tinubu imesisitiza dhamira yake ya kuimarisha usalama na kuwalinda wanafunzi dhidi ya vitendo hivyo vya uhalifu.
CHANZO: TRT Afrika
