Takriban watu milioni 6.5 nchini Somalia wanakabiliwa na njaa kali kutokana na ukame wa muda mrefu uliosababishwa na miaka kadhaa ya mvua chache. Serikali ya Somalia kwa kushirikiana na Umoja wa Mataifa imetoa onyo kuwa hali ya kibinadamu inaendelea kuzorota.
Nchi hiyo ilitangaza hali ya dharura ya ukame mwishoni mwa mwaka 2025 baada ya athari kubwa kwa kilimo, mifugo na upatikanaji wa maji. Watoto wanatajwa kuwa sehemu kubwa ya wanaoathiriwa na utapiamlo mkali.
Maelfu ya familia wamelazimika kuyahama makazi yao na kuelekea katika kambi za muda hasa mjini Mogadishu wakitafuta chakula na msaada wa kibinadamu. Umoja wa Mataifa umeonya kuwa kupungua kwa ufadhili kunaweza kusababisha kusitishwa kwa baadhi ya programu za msaada wa chakula ifikapo Aprili.
Baadhi ya waathiriwa wanasema walipoteza mashamba, mifugo na hata wapendwa wao kutokana na hali ngumu ya ukame. Ingawa mvua zinazotarajiwa katika miezi ijayo zinaweza kupunguza athari kidogo, mamilioni ya watu bado wanatarajiwa kubaki katika hali ya njaa kali.
CHANZO: TRT Afrika
