Shirika la UNICEF limeonya kuwa kuongezeka kwa mapigano kati ya jeshi la Sudan (SAF) na RSF kunawaweka watoto katika hatari kubwa. Mashambulio ya makambi ya wakimbizi na maeneo ya kiraia yamesababisha vifo vya watoto 15 na kujeruhi wengine 10 wiki hii katika Kordofan Magharibi.
Mkurugenzi Mtendaji wa UNICEF, Catherine Russell, alisema hali inayoshuhudiwa sasa Kordofan inafanana na ile ya Darfur, ambapo watoto wanauawa, kujeruhiwa na kufurushwa makazi. Alisisitiza kuwa familia zinazokimbia njaa na vurugu zinahitaji ulinzi wa haraka na endelevu.
Kwa mujibu wa takwimu za Umoja wa Mataifa, zaidi ya raia 57 waliuawa kati ya Februari 15 na 16 katika majimbo manne, wakiwemo watoto 15. Mashambulio yaliyodaiwa kufanywa na SAF na RSF yamelenga masoko, makambi ya wakimbizi, shule na hospitali, hali inayoongeza hatari kwa raia.
UNICEF imetoa wito kwa pande zote kusitisha mashambulio dhidi ya miundombinu ya kiraia na kuhakikisha huduma za kibinadamu zinapatikana bila vizuizi, huku mahitaji ya misaada yakiongezeka kwa kasi.
CHANZO: TRT Afrika
