Washukiwa wa ugaidi wamefanya shambulio dhidi ya mgodi wa dhahabu wa Morila nchini Mali mwishoni mwa wiki, wakichoma vifaa vya uchimbaji na kuwateka wafanyakazi saba kabla ya kuwaachilia baada ya muda mfupi, kwa mujibu wa afisa wa wizara ya madini.
Shambulio hilo lilitokea Jumamosi wakati watu waliokuwa na silaha walipovamia mgodi huo uliopo katika kanda ya Sikasso kusini mwa Mali. Vyanzo vya serikali vimesema wafanyakazi wote waliotekwa waliachiliwa huru jioni ya siku iliyofuata, huku hali ikielezwa kuwa imedhibitiwa.
Tukio hilo linaangazia kuongezeka kwa changamoto za kiusalama nchini Mali, taifa ambalo ni mzalishaji wa tatu wa dhahabu barani Afrika, na ambalo limekuwa likikabiliwa na mashambulizi ya makundi yenye uhusiano na al Qaeda, yanayolenga uwekezaji wa kigeni na rasilimali muhimu.
Mgodi wa Morila, ambao una zaidi ya tani 70 za dhahabu kwa mujibu wa wizara ya madini, uko chini ya mradi wa ushirikiano kati ya serikali ya Mali na kampuni ya Marekani, Flagship Gold, iliyosaini makubaliano ya uchimbaji mwaka uliopita. Serikali ilisimamia mgodi huo baada ya kampuni ya Australia ya Firefinch kujiondoa kutokana na uzalishaji mdogo na gharama kubwa.
Msemaji wa wizara ya madini amesema jeshi la Mali sasa limeimarisha ulinzi na linaendelea kufanya operesheni za msako katika eneo hilo ili kuzuia mashambulizi zaidi.
CHANZO: TRT Afrika
