Madagascar imetangaza kuthibitishwa kwa maambukizi matano ya ugonjwa wa mpox katika mji wa Mahajanga, uliopo kaskazini magharibi mwa nchi, na kuanzisha mara moja hatua za dharura za kudhibiti hali hiyo.
Kwa mujibu wa Waziri wa Afya Monira Managna, visa hivyo vilithibitishwa kupitia vipimo vya maabara, huku wananchi wakihimizwa kuchukua tahadhari na kufuata miongozo ya afya ili kuzuia kusambaa kwa ugonjwa huo.
Serikali imesema mpango maalum wa kukabiliana na mpox umewekwa, ukiwemo utoaji wa taarifa za mara kwa mara kuhusu hali ya kitaifa, pamoja na kuimarisha utayari wa wahudumu wa afya na maafisa wa ufuatiliaji.
Msemaji wa serikali Gascar Fenosoa amesema kituo cha dharura cha afya ya umma kimeanzishwa Mahajanga kwa ajili ya kutambua maambukizi zaidi, kuwatenga wagonjwa na kutoa matibabu, sambamba na kuimarisha ufuatiliaji wa kiafya katika maeneo ya mipakani na viwanja vya ndege.
CHANZO: TRT Afrika
