Yayin da rikicin tsakanin Amurka da Venezuela ke kara ɗumama, shugabanni da hukumomi daga sassa daban-daban na duniya sun fito fili suna Allah-wadai da harin soji da Amurka ta kai, suna cewa matakin ya saɓa dokokin kasa da kasa tare da haifar da barazanar ƙarin rikici da rashin zaman lafiya. Wannan martani ya biyo bayan sanarwar Shugaban Amurka Donald Trump cewa sojojinsa sun kai “babban hari” a Venezuela, inda ya yi ikirarin cewa an kama Shugaba Nicolas Maduro da matarsa sannan aka fitar da su daga ƙasar.
Shugaban Cuba Miguel Díaz-Canel ya bayyana harin a matsayin “haramtaccen farmaki” kuma “ta’addancin gwamnati,” yayin da Ministan Harkokin Wajen Cuba Bruno Rodriguez ya yi tsokaci cewa an kai hari kan ƙasa wadda ba ta kai hari ga kowa ba. A Kolombiya, Shugaba Gustavo Petro ya yi gargadi kan duk wani matakin soja da zai ƙara tabarbarewar lamura, tare da ba da umarnin ƙara tsaro a kan iyakokin ƙasar da yiwuwar karuwar ‘yan gudun hijira.
A cikin Amurka ma, martani ya yi zafi, musamman daga wasu ‘yan majalisar Democrat da suka soki matakin a matsayin wanda aka dauka ba tare da izini ko cikakken hujja ba. Wasu ‘yan majalisa sun yi kira da a mayar da hankali kan bukatun cikin gida maimakon shiga sabon yaki. A Birtaniya kuwa, wasu ‘yan majalisa sun bukaci gwamnati ta yi Allah-wadai da harin, suna danganta shi da muradin Amurka na tasirin siyasa da tattalin arziki a Venezuela.
Rasha ta ce farmakin “hari da makamai ne” kuma ta yi gargadin kara rikicewar lamarin, yayin da Tarayyar Turai ta yi kira da a yi taka-tsantsan tare da jaddada bukatar bin ka’idojin kasa da kasa da tsarin Majalisar Dinkin Duniya. A halin yanzu, ana ci gaba da kira da a kiyaye rayukan fararen hula tare da rage tashin hankali domin kauce wa yaduwar rikicin zuwa sauran kasashen yankin.
