Amurka ta bayyana cewa ta dakatar da aiwatar da bizar ƙaura ga ‘yan Nijeriya da wasu ƙasashe 74, a wani mataki da gwamnatin Shugaba Donald Trump ta ɗauka domin ƙara tsaurara tsarin shige da fice. Wani mai magana da yawun Ma’aikatar Harkokin Wajen Amurka ya ce an dakatar da bizar ƙaura daga ƙasashe 75 gaba ɗaya, inda aka ce matakin ya fara aiki nan take.
Sakatariyar Yaɗa Labarai ta Fadar White House, Karoline Leavitt, ta bayyana cewa jerin ƙasashen da abin ya shafa sun haɗa da Somaliya, Rasha da Iran, tare da wasu ƙasashe abokan hulɗa kamar Brazil, Masar da Thailand. Ta ce matakin na cikin manufofin Trump na rage shigowar baƙi, musamman daga ƙasashen da ba na Turai ba.
Duk da dakatarwar, hukumomi sun ce bizar yawon buɗe ido da ta kasuwanci ba su shiga cikin wannan umarni ba. Sai dai an jaddada cewa za a ƙara tantance bayanan masu neman biza, ciki har da duba tarihin shafukan sada zumunta.
Ma’aikatar Harkokin Wajen Amurka ta ruwaito cewa tun bayan dawowar Trump, an soke fiye da biza 100,000, yayin da Ma’aikatar Tsaron Cikin Gida ta ce an kori daruruwan dubban baƙi, wasu kuma sun bar ƙasar da kansu.
