Tauraron ɗanwasan Nijeriya Victor Osimhen ya rubuta sabon tarihi bayan ya kai ƙwallo ta 200 a rayuwarsa ta ƙwararren ɗanƙwallo. Osimhen ya cim ma wannan gagarumin matsayi ne bayan ya ci ƙwallo a bugun fanareti tare da ba da gudunmawar kafa ƙwallo a wasan da Galatasaray ta doke Kayserispor da ci 4–0 a gasar Super Lig.
Ƙwallo ta 200 ta zo ne bayan Osimhen ya yi fice a ƙungiyoyi daban-daban a Turai, inda ya zura ƙwallaye 76 a Napoli, 20 a Charleroi, 18 a Lille, da 51 a Galatasaray. Wannan ya nuna daidaito da ɗorewar bajintarsa tsawon shekaru.
A matakin ƙasa-da-ƙasa, Osimhen ya kasance ginshiƙi a tawagar Nigeria Super Eagles, inda ya ci ƙwallaye 35, ya zama na biyu a tarihin yawan ƙwallaye, yana bayan marigayi Rashidi Yekini da ƙwallaye kaɗan. A tarihin ƙwallon Nijeriya, kaɗan ne suka haura ƙwallo 200, ciki har da Odion Ighalo da Yakubu Aiyegbeni.
Da yake da shekaru 27 kacal, cimma ƙwallo 200 na nuna cewa Osimhen ya shiga sahun manyan zakarun Nijeriya, kuma har yanzu yana da isasshen lokaci a gaba don ƙara ɗaga darajarsa a tarihin wasan.
