Gwamnatin Canada ta yi kakkausar suka kan matakin da majalisar tsaron Israel ta ɗauka na ƙara faɗaɗa ikon ƙasar a yankin West Bank. A wata sanarwa da Global Affairs Canada ta fitar, Ottawa ta ce matakan sun saɓa wa dokokin ƙasa da ƙasa, suna raunana damar samun zaman lafiya tare da lalata yiwuwar kafa ƙasar Falasdinu mai cin gashin kai. Canada ta buƙaci Isra’ila ta janye daga wannan shawara tare da dakatar da faɗaɗa matsugunan Yahudawa.
Sanarwar ta jaddada cewa mafita ta ƙasashe biyu — Isra’ilawa da Falasdinawa su zauna tare cikin lumana — ita ce hanya mafi ɗorewa ga tsaron ɓangarorin biyu. Wannan matsayi ya sanya Canada cikin jerin ƙasashen da suka nuna damuwa kan sabbin matakan da aka ce sun haɗa da sauye-sauye na doka da mallakar ƙasa a West Bank, matakan da masu suka ke kallon su a matsayin wani mataki na ƙara mamaye yankin.
Majiyar Labari: AA
