Wani sabon rahoto daga ACLED ya nuna cewa hare-haren da ƙungiyoyin da ke da alaƙa da al Qaeda da Daesh ke kaiwa a yankin iyakokin Nijar, Benin da Nijeriya sun ƙaru da kusan kashi 90% tsakanin 2024 da 2025. Rahoton ya ce mace-mace sun ruɓanya, inda fiye da mutum 1,000 suka rasa rayukansu sakamakon tashin hankalin.
Binciken ya nuna cewa mayaƙan sun ƙarfafa zama a sassan Alibori da Borgou na Benin, lardin Dosso na Nijar, da kuma jihohin Kebbi, Neja da Kwara a Nijeriya. ACLED ta yi gargadin cewa barazanar ga fararen hula na ci gaba da ƙaruwa yayin da hare-haren ke bazuwa zuwa sabbin yankuna.
A Nijeriya, duk da yaƙin da aka daɗe ana yi da Boko Haram da ISWAP a arewa maso gabas, rahoton ya ce ƙungiyoyin masu alaƙa da al Qaeda da IS na ƙara ƙarfi a arewa maso yamma. Dazuka masu faɗi da kuma raunin ikon gwamnati sun zama muhimman dalilan da ke taimaka musu.
Faɗaɗar hare-haren ta ƙara tayar da hankali a siyasar yankin, inda batun tsaro ya kasance cikin dalilan juyin mulki a Mali, Burkina Faso da Nijar. Rahoton ya kuma lura da yadda ƙungiyoyin ke ƙara yaɗa bayanai kan ayyukansu, abin da ka iya nuna gasa tsakanin su — lamarin da zai iya ƙara tsananta rikicin.
