Shugaban Nijeriya, Bola Ahmed Tinubu, ya umurci dukkan masu rike da mukaman siyasa da ya nada da ke son tsayawa takara a zaben 2027 da su ajiye ayyukansu kafin ranar 31 ga Maris. An bayyana wannan umarni ne ta bakin shugaban sashen yada labarai na ofishin sakataren gwamnatin tarayya, Dewan Goshit, a ranar Talata.
A cewar Goshit, wannan mataki ya yi daidai da dokar zabe ta 2026 da kuma jadawalin da hukumar zabe ta kasa (INEC) ta fitar domin shirye-shiryen zaben fid da gwani na jam’iyyu. Umarnin ya shafi ministoci, masu ba da shawara, shugabannin hukumomi da sauran manyan jami’an gwamnati da ke da niyyar shiga zaben.
An kuma bukaci duk wadanda abin ya shafa da su mika takardun murabus dinsu cikin wa’adin da aka bayar. Shugaban ya jaddada cewa wannan doka na da muhimmanci wajen tabbatar da gaskiya da adalci a harkar siyasa, tare da bai wa dukkan ‘yan takara dama iri daya.
Tinubu ya kuma bukaci jami’an da su bi wannan umarni ba tare da jinkiri ba, yana mai cewa gwamnatinsa na da kudurin karfafa tsarin dimokuradiyya da kuma tabbatar da sahihancin zabuka a kasar.
