Shirika la Afya Duniani (WHO) na UNICEF wamehimiza serikali kuimarisha usaidizi wa unyonyeshaji kupitia mifumo bora ya afya, kupanua ulinzi wa uzazi na programu zinazotegemea jamii, wakionya kwamba mamilioni ya akina mama bado hawana huduma zinazohitajika ili kuwapa watoto mwanzo mzuri zaidi wa maisha.
Katika taarifa ya pamoja iliyotolewa kabla kuanza ya Wiki ya Unyonyeshaji Duniani, inayoadhimishwa kuanzia Agosti 1 hadi 7, mashirika hayo yalisema unyonyeshaji unasalia kuwa mojawapo ya njia bora zaidi za kulinda afya na ukuaji wa watoto wachanga huku pia ukitoa faida kubwa za kiafya kwa akina mama.
“Akina mama na familia nyingi sana kote ulimwenguni bado wanakosa huduma na hatua zinazowezesha na kusaidia unyonyeshaji,” Mkurugenzi Mtendaji wa UNICEF Catherine Russell na Mkurugenzi Mkuu wa WHO Dkt. Tedros Adhanom Ghebreyesus walisema katika taarifa hiyo.
Waliongeza: “Hata hivyo, kunyonyesha ni mojawapo ya njia rahisi na zenye nguvu zaidi za kulinda afya ya mtoto. Huwapa watoto wachanga na watoto wadogo lishe muhimu, huongeza kinga, husaidia kulinda dhidi ya magonjwa makubwa, na husaidia ukuaji wa utambuzi.”
Kuzuia vifo vy awatoto
Mashirika ya Umoja wa Mataifa yalisema viwango vya unyonyeshaji duniani vinaboreka, huku unyonyeshaji pekee wakati wa miezi sita ya kwanza ya maisha ukiongezeka kutoka takriban 37% mwaka 2012 hadi zaidi ya 47% leo.
Kunyonyesha hadi umri wa miaka miwili pia kumeongezeka kutoka 38% hadi 50% katika kipindi cha miaka mitano iliyopita. Hata hivyo, walisema maendeleo bado hayajalinganishwa, hasa katika nchi zenye kipato cha chini na mazingira ya kibinadamu, ambapo upatikanaji wa huduma za usaidizi wa kunyonyesha ni mdogo.
Wataalamu wa afya wanasema kwamba kupanua hatua zilizothibitishwa, kiwa ni pamoja na usaidizi wa unyonyeshaji wenye ujuzi katika vituo vya afya, ushauri nasaha wa jamii, likizo ya uzazi yenye malipo na utekelezaji imara wa Kanuni ya Kimataifa ya Masoko ya Vibadala vya Maziwa ya Mama, kunaweza kuzuia vifo vya watoto karibu 400,000 na vifo vya akina mama wapatao 140,000 kila mwaka.
“Wiki hii ya Unyonyeshaji Duniani, chini ya kaulimbiu, ‘Kunyonyesha kwa Ajili ya Mwanzo Endelevu Maishani: Kuimarisha Kinachofanya Kazi,’ UNICEF na WHO wanatoa wito kwa nchi kuimarisha mifumo ya afya ili kutoa usaidizi bora wa unyonyeshaji kwa akina mama na watoto wachanga,” taarifa hiyo ilisema.
Mwanzo boa katika maisha
Pia ilitoa wito kwa serikali kupanua ushauri nasaha unaotegemea jamii, kuwekeza katika likizo ya uzazi yenye malipo, kuunganisha usaidizi wa unyonyeshaji katika huduma za afya ya mama na kudumisha usaidizi wakati wa migogoro ya kibinadamu.
Tedros aliongeza kuwa, “Kunyonyesha ni muhimu. Kwa kuwekeza katika suluhisho zilizothibitishwa, tunaweza kumpa kila mtoto mwanzo bora maishani na kuhakikisha kila mama anapata huduma na huduma anazohitaji.”
