Rais Donald Trump amesema amekataa pendekezo la hivi karibuni lililotolewa na Iran la kufungua tena Mlango-bahari wa Hormuz.
“Nakataa pendekezo lao,” Trump alisema Jumamosi, akizungumza na waandishi wa habari wakati akiondoka Ikulu ya White House kuelekea Tennessee kwa ajili ya ziara ya kampeni.
“Wanataka kufikia makubaliano ambapo watafungua njia hiyo ya maji mara moja kwa sababu wanapata hasara kubwa sana,” alisema.
“Wanataka kufanya makubaliano, na nadhani hilo ni sawa. Mimi pia napenda kufikia makubaliano,” aliongeza.
Iran iliwasilishia Marekani mpango wa kufungua tena njia muhimu katika Mlango-bahari wa Hormuz na kusema kuwa Tehran inaweza kuifungua njia hiyo ndani ya siku saba iwapo Marekani itakubali mpango huo uliowasilishwa kupitia Qatar.
Waziri wa Mambo ya Nje wa Iran, Abbas Araghchi, aliwaambia waandishi wa habari mjini New York, pembezoni mwa Mkutano Mkuu wa 81 wa Umoja wa Mataifa, kwamba muda huo wa siku saba ungeanza mara tu Washington itakapokubali pendekezo hilo.
Alisema Marekani ingetarajiwa kuchukua hatua ndani ya siku nne au tano za kwanza, ili kuruhusu njia hiyo kufunguliwa tena siku ya sita.
Mapema wiki hiyo, Araghchi alifanya mazungumzo na mjumbe wa Trump, Steve Witkoff, na hapo awali aliweka masharti ya kumaliza vita na kufungua tena njia hiyo muhimu ya usafirishaji wa meli.
“Iran imeiwasilishia Marekani, kupitia Qatar, mpango madhubuti wa siku saba. Iwapo masharti muhimu yatatimizwa, njia hiyo inaweza kufunguliwa tena, na usafiri wa kawaida wa baharini kurejeshwa ndani ya siku saba,” alisema Araghchi katika makao makuu ya Umoja wa Mataifa.
“Uamuzi sasa uko mikononi mwa Marekani. Iran haikubali kulazimishwa, vitisho au vitendo vya kutisha, na Iran haitasalimu amri kuhusu haki zake za kimsingi za kitaifa chini ya shinikizo,” aliongeza.
Chini ya mpango huo, Washington ingeondoa kizuizi chake cha majini dhidi ya bandari za Iran, kuondoa vikwazo kwenye mauzo ya mafuta ya Iran, kuachilia takriban dola bilioni 12 za mali za Iran zilizozuiliwa, na kuzingatia usitishaji wa mapigano katika eneo hilo, ikiwemo Lebanon na Yemen.
Kwa upande wake, Iran ingefungua tena njia ya Hormuz.
Hata hivyo, saa chache baada ya kauli zake, gazeti la The Wall Street Journal liliripoti kuwa Trump alikuwa amekataa pendekezo hilo, likinukuu maafisa wa Marekani wenye ufahamu wa suala hilo. Hossein Mohebi, msemaji wa Jeshi la Walinzi wa Mapinduzi la Iran, alinukuliwa na shirika la habari la Tasnim akisema, “Hatutaacha kuiadhibu Marekani hadi pale masharti saba ya Iran yatakapotekelezwa.”
