Shugaban ƙasa na ƙungiyar Jama’atu Izalatil Bid’ah Wa Iqamatis Sunnah (JIBWIS), Sheikh Abdullahi Bala Lau, ya yi kakkausar suka kan wani bidiyo da ya bazu a kafafen sada zumunta, wanda ke nuna wani mutum sanye da kayan aikin sashen agajin gaggawa na ƙungiyar, yana cikin masu gudanar da atisayen tsere tare da rera kalamai masu tayar da hankali, inda yake kira da a ba su bindigogin AK-47 domin su tafi Enugu ranar Lahadi su kai hari.
Da yake mayar da martani kan wannan lamari mai tayar da hankali, Sheikh Bala Lau ya yi kira ga Hukumar Tsaro ta Farin Kaya (DSS), rundunar ’yan sandan Nijeriya da sauran hukumomin tsaro da abin ya shafa da su gudanar da bincike cikin gaggawa, gano waɗanda ke da hannu a lamarin, tare da tabbatar da cewa an gurfanar da duk wanda aka samu da laifi a gaban doka.
Shugaban ƙungiyar ya bayyana karara cewa JIBWIS ba ta da alaƙa da waɗannan kalamai masu tunzura jama’a.
Ya jaddada cewa irin kalaman da ke ɗauke da barazanar tashin hankali, tsoratarwa da kai hari ga kowace al’umma sun saɓa wa ƙa’idoji, koyarwa da manufofin da aka kafa ƙungiyar a kansu.
Ya kuma jaddada cewa kasancewar mutum sanye da kayan aikin sashen agajin gaggawa na JIBWIS, ko kuma kasancewarsa cikin mutanen da ke sanye da irin waɗannan kayan, ba ya tabbatar da cewa yana magana ne a madadin ƙungiyar ko kuma da izininta.
Sheikh Bala Lau ya ƙara bayyana damuwarsa kan yiwuwar cewa lamarin wata dabara ce da wasu mutane ko wasu masu wata manufa suka shirya domin ɓata sunan ƙungiyar da kuma lalata kyakkyawan martabar da ta daɗe tana ginawa.
Saboda haka, ya bukaci hukumomin tsaro da su gudanar da cikakken bincike kan yadda bidiyon ya samo asali, ciki har da gano mutanen da ke cikinsa, ƙungiyoyin da suke da alaƙa da su da kuma dalilan da ka iya sa su aikata hakan.
Shugaban ya tuna cewa kwanan nan JIBWIS ta shirya wani taron ƙasa da ƙasa a Abuja, wanda ya haɗa shugabannin Kiristoci, malaman Musulunci daga mazhabobi daban-daban, manyan mutane da kuma mahalarta daga sassa daban-daban na duniya.
Babban manufar taron ita ce bunƙasa tattaunawa tsakanin mabiya addinai, fahimtar juna, haƙurin addinai da zaman lafiya.
Ya yi tambaya kan yadda za a danganta ƙungiyar da kalaman da ke kira ga tashin hankali a kan ’yan Nijeriya, alhali kuwa ƙungiyar ta daɗe tana amfani da albarkatunta, shugabancinta da tsarinta wajen gina kyakkyawar alaƙa tsakanin mabiyan addinai da ƙabilu daban-daban.
Tsawon kusan shekaru 48 tun lokacin da aka kafa ta, JIBWIS ta ce ta ci gaba da jajircewa wajen yaɗa ingantattun koyarwar Musulunci, ƙarfafa bin Sunnar Annabi Muhammad (SAW), gyaran ɗabi’a, ilimi, ayyukan jin ƙai da kuma zaman lafiya tsakanin mutane ba tare da la’akari da addininsu, ƙabilarsu ko yankin da suka fito ba.
