Rais Cyril Ramaphosa ameweka wazi mkakati mpya wa kupambana na uhalifu wa magenge nchini Afrika Kusini, akieleza kuwa tatizo hilo limekuwa tishio kubwa kwa mustakabali wa demokrasia na uchumi wa taifa. Katika hotuba yake kwa mabunge yote mawili, alitangaza kuwa jeshi litashirikiana na polisi ili kudhibiti mauaji na vitendo vya magenge vinavyokithiri.
Kwa mujibu wa takwimu, takribani watu 60 huawa kila siku nchini humo, kutokana na mapigano ya magenge ya dawa za kulevya mjini Cape Town na ufyatulianaji risasi unaohusiana na uchimbaji haramu wa madini katika Gauteng. Ramaphosa ameagiza kuandaliwa mpangokazi wa kupeleka vikosi vya usalama katika maeneo haya ndani ya muda mfupi.
Hatua za ziada ni pamoja na kuajiri maafisa wapya wa polisi 5,500 na kuimarisha ukusanyaji wa taarifa za kijasusi. Rais alisisitiza kuwa uhalifu unakatiza maisha na mustakabali wa wananchi, huku ukileta hofu na kuzuia uwekezaji wa kibiashara.
CHANZO: TRT Afrika
