Rais wa Jamhuri ya Congo (Congo-Brazzaville), Denis Sassou Nguesso, ametangaza kuwa atashiriki katika uchaguzi wa urais unaotarajiwa kufanyika Machi 2026. Tangazo hilo lilitolewa Alhamisi mbele ya maelfu ya wananchi katika wilaya ya kusini ya Ignie, na baadaye kuthibitishwa na ofisi yake.
Nguesso, mwenye umri wa miaka 82, ameongoza nchi hiyo kwa zaidi ya miongo minne. Kisheria hana kizuizi cha kugombea, baada ya marekebisho ya katiba ya mwaka 2015 kuondoa kikomo cha umri wa wagombea na kuanzisha mfumo wa mihula mitatu ya miaka mitano.
Nguesso aliiongoza Congo-Brazzaville kuanzia 1979 hadi 1992 katika mfumo wa chama kimoja, kabla ya kushindwa na Pascal Lissouba katika uchaguzi wa kidemokrasia wa kwanza. Alirejea madarakani mwaka 1997 baada ya vita vya wenyewe kwa wenyewe na amebaki mamlakani hadi sasa.
Chama tawala Congolese Labour Party (PCT) kilitangaza Disemba 2025 kwamba Nguesso atawania muhula mpya. Katika uchaguzi wa Machi 2021, alishinda kwa zaidi ya asilimia 88 ya kura.
CHANZO: TRT Afrika
