Bunge la Serikali ya Shirikisho ya Somalia limepitisha azimio linalosema wazi kuwa jaribio lolote la kuitambua Somaliland na Israel au taifa jingine lolote halina msingi wa kisheria, ni batili na halitambuliwi chini ya sheria za kimataifa.
Azimio hilo lilipitishwa wakati wa kikao cha pamoja cha Baraza la Wawakilishi na Seneti kilichofanyika katika jengo la Villa Hargeysa, mjini Mogadishu.
Kikao hicho kiliongozwa na Spika wa Baraza la Wawakilishi, Sheikh Aden Mohamed Nur “Madobe”, pamoja na Naibu Spika wa Seneti, Seneta Ali Shacbaan Ibrahim.
Akizungumza wakati wa ufunguzi wa kikao, Spika Madobe alisema kwa masikitiko kwamba hatua ya Israel, kwa mtazamo wa bunge, ni uvunjaji wa uhuru wa Somalia, umoja wa kitaifa na uadilifu wa mipaka ya nchi. Alisisitiza kuwa hatua hiyo haikubaliki na akawahimiza Wasomali waliopo ndani na nje ya nchi kuendelea kuwa wamoja katika kulinda taifa lao.
Kwa mujibu wa taarifa ya bunge, wabunge walisisitiza tena mamlaka kamili ya Somalia juu ya ardhi yake, uhuru na mipaka yake, wakieleza kuwa Somaliland ni sehemu ya Jamhuri ya Shirikisho ya Somalia isiyoweza kutenganishwa.
Azimio hilo linaeleza kuwa utambuzi wowote unaodaiwa na Israel au taifa lingine utakuwa kinyume cha sheria za kimataifa, ikiwemo Mkataba wa Umoja wa Mataifa pamoja na kanuni za mashirika ya kikanda na kimataifa ambayo Somalia ni mwanachama.
Baada ya mjadala, wabunge walipiga kura kwa wingi kuidhinisha azimio hilo, ambapo wabunge 168 waliunga mkono, wawili walipinga na hakuna aliyejizuia.
Azimio hilo pia linaelekeza Serikali ya Shirikisho kuwasilisha msimamo huo rasmi kwa jumuiya za kimataifa na kikanda, ikiwemo Umoja wa Mataifa, Umoja wa Afrika, Ligi ya Kiarabu, Jumuiya ya Ushirikiano wa Kiislamu, IGAD na Jumuiya ya Afrika Mashariki.
Aidha, linaonya kuwa mtu au taasisi yoyote itakayokiuka azimio hilo inaweza kuchukuliwa hatua za kisheria kwa mujibu wa sheria za Somalia na mifumo ya kimataifa inayotumika.
Bunge lilisisitiza kuwa kura hiyo inaakisi msimamo madhubuti wa Somalia katika kulinda uadilifu wa eneo lake, huku serikali ikiendelea kutafuta uungwaji mkono wa kimataifa kwa mujibu wa sheria za kimataifa.
CHANZO: TRT Afrika
