Ma’aikatar Harkokin Wajen Falasdinu ta bayyana cewa amincewar gwamnatin Isra’ila da shirin rajistar manyan yankuna na West Bank a matsayin “ƙasar gwamnati” ba shi da inganci a doka. A cewar ma’aikatar, matakin na da nufin hanzarta mamaye ƙasa da kuma faɗaɗa matsugunan Yahudawa, wanda Falasdinawa ke kallon a matsayin cin zarafin haƙƙinsu.
A cikin sanarwar da aka fitar, Falasdinu ta yi kakkausar suka ga duk wani yunƙuri na mayar da ƙasar da ake jayayya a kanta zuwa mallakin Isra’ila. Ta ce hakan na ƙoƙarin halatta kwace ƙasa, tare da sauƙaƙa gina sabbin matsugunai da kuma ƙarfafa manufofin haɗe West Bank da Isra’ila.
Ma’aikatar ta jaddada cewa matakin ya saɓa wa dokokin ƙasa da ƙasa, ciki har da ƙudurin Majalisar Tsaro ta MDD mai lamba 2334, wanda ya sake tabbatar da haramcin matsugunan Yahudawa a yankunan Falasdinu da aka mamaye. Haka kuma ta ambaci hukuncin Kotun Duniya (ICJ), wadda ta bayyana mamayar Isra’ila a matsayin ba bisa doka ba.
Falasdinu ta bukaci al’ummar duniya da hukumomin ƙasa da ƙasa su dauki matakin gaggawa domin dakatar da manufofin mamaye ƙasa, tare da kare mafitar kasashe biyu. Wannan na zuwa ne yayin da rahotanni ke nuna cewa Isra’ila na ci gaba da faɗaɗa iko da ayyukanta a West Bank da Gabashin Kudus.
Majiyar Labari: AA
