Ministan harkokin wajen Faransa, Jean-Noël Barrot, ya bayyana cewa duniya na shiga wani sabon mataki na tsananin gasa tsakanin manyan ƙasashe biyu – Amurka da China. A yayin wata hira da ya yi a shirin L’événement na tashar France 2, ya bukaci Turai ta samar da wata “hanya ta uku” domin kauce wa jingina kai tsaye ga kowanne bangare.
Barrot ya ce Amurka ita ce babbar ƙasar da ta mamaye karni na 20, yayin da China ke tasowa a matsayin sabuwar ƙarfi a duniya. A cewarsa, wannan gasa ta siyasa da tattalin arziki tsakanin ƙasashen biyu na iya kaiwa ga rikice-rikice a nan gaba idan ba a kula ba.
A wannan yanayi, ministan ya jaddada cewa ƙasashen Turai su kasance masu zaman kansu a harkokin siyasa da tsaro. Ya ce abin da Faransa da Turai ke nema shi ne Turai mai ƙarfi wadda ba za ta bari a ja ta cikin rikicin manyan ƙasashe ba.
Har ila yau, ya yi gargadi cewa Amurka da China na iya kokarin jawo wasu ƙasashe su shiga bangarensu. A cewarsa, Turai mai ƙarfi da haɗin kai za ta iya tsayawa tsayin daka domin kare muradunta ba tare da bin kowanne bangare ba.
