Likitar Maroko Zineb Al-Mazabri, ƙwararriya a tiyata da fannin uwa da jariri, ta bayyana halin lafiya a Gaza a matsayin “mummunan rauni ga bege,” tana mai cewa kusan babu tsarin lafiya a yankin, kuma kayan aikin asibiti sun lalace ko sun ɓace gaba ɗaya.
Ta ce ma’aikatan lafiya na Falasdinu sun gaji matuka har sun kasa kula da kansu, balle iyalansu, sai dai kasancewar wani likita daga ƙasashen waje a yankin kan ɗan dawo musu da ƙaramin bege. Al-Mazabri, wacce ta shiga Gaza a watan Disamba, ta ce ta tarar garuruwa sun zama kango, gine-gine sun rushe, yayin da jama’a ke rayuwa a cikin ragowar bango ko kuma tsoffin tantuna marasa kariya.
Rahotanni sun nuna cewa yakin ya lalata fiye da kashi 90% na gine-ginen jama’a, ciki har da asibitoci. Ta ce kusan asibitoci 94% sun lalace gaba ɗaya ko a rabi, ciki har da asibitin Al-Shifa, wanda ya kasance ginshiƙin kula da lafiya. Ta ce babu kayan aiki, babu magunguna, babu na’urorin tantance cuta, sannan ma’aikatan lafiya suna aiki ba kakkautawa yayin da suke rayuwa cikin tsananin wahala.
Ta bayyana cewa mata masu juna biyu da yara na fuskantar babban haɗari saboda yunwa, rashin ruwa mai tsafta da rashin magunguna, tare da ƙarin matsalar tabin hankali sakamakon bala’in yaƙi. Ta kuma jaddada cewa dubban marasa lafiya na bukatar a kai su ƙasashen waje don samun magani, amma kafafen fita sun yi matuƙar wahala.
Al-Mazabri ta ce abin da Gaza ke bukata a halin yanzu shi ne taimako, kayan lafiya, tallafi, kuma sama da komai — bege. Ta yi kira ga likitoci da al’ummomi su tallafa cikin duk wata hanya. Ta kuma bayyana cewa duk wanda ya ga halin Gaza da idonsa, babu yadda zai manta rayuwar da ke can.
