Gaza: Zaidi ya wanandoa 50 wafunga ndoa katikati ya magofu kwa msaada wa UAE

Sherehe ya ndoa ya pamoja kwa wanandoa 54 imefanyika katika mji wa Khan Younes, kusini mwa Gaza, katikati ya magofu ya majengo yaliyobomolewa. Tukio hilo, lililoandaliwa kwa msaada wa Umoja wa Falme za Kiarabu kupitia operesheni ya kibinadamu Gallant Knight 3, lililenga kuonyesha ustahimilivu wa wananchi licha ya uharibifu unaosababishwa na mashambulizi ya Israeli. Wanandoa walichaguliwa kwa droo kutoka maombi zaidi ya 2,600, huku eneo la sherehe likipambwa na bendera za Palestina, maua na nyimbo za kitamaduni. Licha ya hatua za usaidizi, mashambulizi yameripotiwa kuendelea, na kusababisha vifo zaidi ya 70,000 na majeruhi 171,000 tangu 2023.