Firayim Ministan Isra’ila Benjamin Netanyahu ya ce gwamnati za ta duba batun tsawaita wa’adin aikin soja bayan hutun Passover, saboda matsanancin karancin jami’ai a rundunar sojin kasar. Rahotanni sun nuna cewa shugaban hafsoshin soji Eyal Zamir ya gargadi majalisar tsaro cewa idan ba a samo mafita ga wannan matsala ba, rundunar za ta shiga babban mawuyacin hali.
An kuma bayyana cewa rundunar sojin Isra’ila na fama da gibin kusan sojoji 15,000, ciki har da mayaƙa 8,000, a daidai lokacin da take fuskantar buƙatar jami’ai a wurare da dama. Wannan ya haɗa da ayyukan soja da ake dangantawa da Gaza, Lebanon da sauran yankuna, lamarin da ya ƙara matsa lamba kan tsarin ɗaukar ma’aikata da aikin dole. Wannan ce ta sa gwamnatin ke son sake dawo da batun dokar aikin soja da kuma yiwuwar tsawaita lokacinsa.
Batun ya kuma sake hura wutar rikicin siyasa a cikin Isra’ila, musamman game da ko za a ci gaba da bai wa Yahudawan Haredim rangwame daga shiga aikin soja ko a’a. Netanyahu ya nuna cewa gwamnati ce za ta yanke hukunci, ba masu ba da shawara na doka ba. A halin yanzu, aikin soja na dole a Isra’ila yana nan a kusan watanni 32 ga maza da watanni 24 ga mata, yayin da ake nazarin yiwuwar mayar da shi watanni 36 ga maza.
