Kiristocin Gaza sun shafe bukukuwan Kirsimeti cikin tsoro da shiru, yayin da karar bama-baman Isra’ila da amo na jiragen yaki marasa matuka ke ci gaba da ratsa sararin samaniya, lamarin da ya hana duk wata ma’ana ta shagali.
Rahotannin Al Jazeera sun ce yawancin majami’u sun rage ko soke bukukuwan Kirsimeti gaba ɗaya, inda aka maye gurbinsu da ƙananan tarukan addu’a saboda rashin tsaro da fargaba. Wakilin kafar ya bayyana cewa “babu wani yanayin murna” a Gaza City.
A halin da ake ciki, kasashe 14 ciki har da Birtaniya, Kanada da Faransa sun soki amincewar Isra’ila na kafa sabbin matsugunan Yahudawa 19 a Gaɓar Yamma, suna cewa matakin na barazana ga zaman lafiya.
Tun watan Oktoban 2023, hare-haren Isra’ila sun kashe Falasɗinawa sama da 70,900, tare da jikkatar dubban mutane. A cewar ƙididdiga, adadin Kiristocin Falasɗinu bai kai 50,000 ba a yau, sakamakon mamaya, talauci da rashin tsaro.
