Kotun Koli ta Isra’ila ta umarci gwamnati da ta gabatar da martaninta kafin ranar 24 ga Mayu, bayan da kungiyoyin kare hakkin bil’adama suka shigar da kara don soke dokar da ta ba da damar zartar da hukuncin kisa ga fursunonin Falasɗinawa. Kungiyar Adalah, tare da wasu kungiyoyi da ‘yan majalisa, sun ce dokar ta keta hakkin rayuwa kuma tana dauke da hukunci mai tsauri da rashin tausayi.
A cewar masu kalubalantar dokar, wannan mataki yana nuna kin amincewa gaba daya da hakkin rayuwa, wanda ya saba da ka’idojin kasa da kasa. Kotun ta bukaci gwamnati ta kare matsayinta, yayin da ake ci gaba da muhawara mai zafi a cikin al’umma da bangaren siyasa.
Majalisar dokokin Isra’ila (Knesset) ta amince da dokar da kuri’u 62 kan 48, tare da goyon bayan Firayim Minista Benjamin Netanyahu. Dokar ta tanadi aiwatar da hukuncin kisa ta hanyar rataya, tare da boye sunayen masu aiwatarwa da ba su kariya ta doka, da kuma takaita ziyara ga fursunonin da aka yankewa hukuncin kisa.
Dokar ta jawo suka daga bangarori daban-daban, inda sama da fitattun mutane 1,200 a Isra’ila, ciki har da masu lambar yabo ta Nobel da tsofaffin jami’an soja da alkalan kotu, suka bayyana adawarsu, suna kallon dokar a matsayin matsala ta dabi’a da ke bukatar a sake duba ta.
Majiyar Labari: AA
