Rais Emmanuel Macron amesema tangu kuingia madarakani mwaka 2017 amekuwa akijitahidi kuvunja mifumo ya kiuhusiano iliyoachwa na enzi za ukoloni na kuanzisha ushirikiano mpya na Afrika. Akijitaja kama rais wa kwanza wa Ufaransa aliyezaliwa baada ya enzi za ukoloni, Macron alisisitiza kuwa anataka kuondoka kwenye mtazamo wa kihistoria wa kiukoloni, huku akitambua ukweli wa historia bila kuingia katika msimamo wa kuomba msamaha.
Macron alieleza kuwa hatua ya Ufaransa kujiondoa katika baadhi ya nchi za Sahel imepelekea tawala za kijeshi kukaribia Urusi, hasa Mali, akisema msaada wa usalama wa Urusi kupitia kundi la Wagner ni aina ya “ukoloni mpya” unaolenga kulinda watawala kwa kubadilishana na rasilimali na ushawishi wa kudumu.
Akijitofautisha na mtazamo huo, Macron alisema Ufaransa haitaki tena kuingilia au kuunga mkono tawala, bali inachukua msimamo wa kujiondoa pale ambapo ushirikiano unavunjwa na wenyeji. Alitaja Benin kama mfano wa ushirikiano thabiti na wa kisiasa, akisema ni kielelezo cha sera mpya ya Paris ya kujenga uhusiano wa wazi, usio na mizigo ya kihistoria na unaolenga mustakabali.
