Serikali kadhaa za Afrika zimeanza kuchukua hatua za haraka kuwalinda raia wao walioko Mashariki ya Kati kufuatia kuongezeka kwa mvutano kati ya Iran, Israel na Marekani.
Nchi kama Afrika Kusini, Uganda, Ghana na Kenya zimetoa tahadhari za usalama huku baadhi zikihimiza raia wao kujisajili katika balozi au hata kuondoka katika maeneo yenye hatari. Afrika Kusini imewataka raia wake kuwasiliana na balozi ili kurahisisha msaada wa kibalozi endapo hali itazidi kuwa mbaya.
Uganda imewashauri wananchi wake waliopo Iran kuondoka haraka inapowezekana, wakati Ghana imesitisha safari zisizo za lazima kuelekea eneo hilo kutokana na hatari za usalama na kufungwa kwa anga katika baadhi ya nchi.
Kenya nayo imewataka raia wake kuchukua tahadhari kubwa, kuepuka maeneo ya kijeshi na kufuatilia taarifa rasmi huku serikali ikiendelea kuwasiliana na balozi zake katika ukanda huo.
CHANZO: TRT Afrika
