Uturuki imethibitisha dhamira yake ya kuendelea kuimarisha ushirikiano wa kijeshi na mataifa ya Afrika, ikilenga kutoa mafunzo, msaada wa kiufundi na vifaa ili kusaidia juhudi za kukabiliana na ugaidi na kuimarisha usalama katika bara hilo.
Akizungumza jijini Ankara wakati wa mkutano na wawakilishi wa vyombo vya habari, Waziri wa Ulinzi wa Uturuki alisema kuwa ushirikiano kati ya Uturuki na Afrika umeendelea kukua kwa kasi katika miaka ya karibuni, hasa katika sekta ya ulinzi, kutokana na misingi ya uhusiano wa kihistoria na kitamaduni kati ya pande hizo.
Alieleza kuwa Uturuki inaendelea kujibu maombi kutoka mataifa ya Afrika kwa kutoa mafunzo ya kijeshi, msaada wa kifedha, vifaa na ushauri wa kitaalamu kwa majeshi ya nchi mbalimbali, kwa lengo la kuongeza uwezo wao wa kujilinda. Katika muktadha huo, Uturuki pia inaendesha programu za mafunzo ya lugha ya Kituruki katika nchi kadhaa za Afrika kupitia taasisi zake za elimu na utamaduni.
Kwa upande wa Libya, Uturuki ilisisitiza kuwa inaendelea kutoa mafunzo, ushauri na usaidizi wa kijeshi kwa lengo la kuchangia katika amani, umoja wa kitaifa na uthabiti wa kisiasa wa nchi hiyo. Ushirikiano wa baharini kati ya nchi hizo mbili pia umeendelea kuimarishwa kufuatia makubaliano yaliyotiwa saini mwaka 2019, yakijumuisha maeneo kama ulinzi wa nishati na kudhibiti uhamiaji usio halali. Uturuki ilisisitiza kuwa inaunga mkono kikamilifu mchakato wa kisiasa unaoongozwa na Umoja wa Mataifa nchini Libya.
Somalia imetajwa kama mshirika muhimu mwingine wa Uturuki barani Afrika, ambapo mchango wa Ankara katika masuala ya usalama umeendelea kuongezeka. Uturuki imepanua shughuli zake za mafunzo, ushauri na msaada wa kijeshi nchini humo, ikiwemo kuanzisha kikosi cha anga chenye helikopta za mashambulizi kwa ajili ya kusaidia uthabiti wa usalama.
Aidha, ushirikiano wa masuala ya baharini kati ya Uturuki na Senegal umeimarika, huku ndege za doria ya baharini za Uturuki zikianza operesheni za utafutaji na uokoaji, pamoja na kusaidia mafunzo na tathmini za kiusalama wa bahari kwa majeshi ya Senegal. Uturuki pia imeendelea kutoa msaada wa mafunzo kwa majeshi ya Mali na Niger.
Kwa ujumla, Uturuki imesisitiza kuwa inaona usalama na uthabiti wa Afrika kama kipaumbele chake, na kwamba itaendelea kuimarisha uhusiano wake na mataifa ya bara hilo kwa misingi ya kuheshimiana na kuaminiana.
CHANZO: TRT Afrika
