Maporomoko ya ardhi yaliyosababishwa na mvua kubwa katika eneo la Amhara nchini Ethiopia siku ya Jumatatu yamesababisha vifo vya watu 14 na kuwajeruhi wengine saba, na idadi isiyojulikana ya watu ambao bado haijapatikana wakati shughuli za utafutaji na uokoaji zikiendelea.
Maporomoko hayo yalitokea katika jumba la watawa la Mtakatifu Maria la Tsadqane Debre Mitmaq, ambapo mamia ya waumini walikuwa wamekusanyika kwa ajili ya ibada ya kubariki maji, ibada ambayo ni maarufu miongoni mwa watu wanaotafuta uponyaji wa kiroho kwa ajili ya magonjwa sugu.
“Maafa hayo yalitokea yapata saa moja asubuhi, na wengi waliofariki walikuwa wamekusanyika ili kupata maji hayo matakatifu,” Megabe Hadis Neka Tibeb Ababu, meneja mkuu wa dayosisi hiyo, aliambia shirika la habari la AP.
Alisema kuna watu ambao idadi yao haijajulikana wanaoaminika bado wamenaswa chini ya vifusi.
Walioathirika
“Kati ya waliofariki, 11 tayari wamezikwa katika eneo la jumba hilo (monasteri), huku miili ya wengine ikipelekwa katika maeneo yao ya asili,” alisema, akiongeza kuwa bado ni vigumu kuwatambua baadhi ya waathiriwa.
Wale waliopata majeraha makubwa walikimbizwa Debre Birhan, makao makuu ya Eneo la Utawala la Shewa, umbali wa takriban kilomita 70 (maili 43) kutoka monasteri hiyo.
Maporomoko hayo yalitokea karibu na mlima, ambapo miamba mikubwa iling’oka na kuangukia waumini hao, jambo lililozidisha ukubwa wa maafa hayo.
Timu ya wataalamu kutoka ofisi ya eneo husika inayoshughulikia kinga dhidi ya majanga imetumwa kusaidia shughuli za utafutaji na uokoaji, kulingana na taarifa iliyotolewa na ofisi ya mawasiliano ya utawala wa eneo hilo.
Mabadiliko ya Tabianchi
Maporomoko ya matope na mafuriko yanayosababishwa na mvua kubwa yamekuwa ya kawaida nchini Ethiopia, hasa wakati wa msimu wa mvua, unaojulikana kama Kiremt, ambao kwa kawaida huanzia Juni hadi Septemba.
Mnamo Julai 2024, maporomoko ya matope yaliyosababishwa na mvua kubwa yaliwaua watu wasiopungua 257 kusini mwa Ethiopia. Mapema mwaka huu, zaidi ya watu 100 pia walikufa katika maporomoko kama hayo huko Gamo, kusini mwa Ethiopia.
Taifa la Pembe ya Afrika limeathiriwa zaidi na matukio mabaya ya hali ya hewa yanayohusiana na mabadiliko ya tabianchi. Miundombinu duni, hasa katika maeneo ya vijijini, imeacha jamii nyingi katika hatari kubwa ya mafuriko, maporomoko ya ardhi, na ukame unaorudiwa, zikiwa na uwezo mdogo wa kukabiliana na majanga kama hayo.
