Cike da alhini da jimami, gwamnatin Libya ta samu mummunan labari daga Turkiyya, inda wani hatsarin jirgin sama ya yi sanadiyyar rasuwar manyan jagororin sojin ƙasar yayin da suke kan hanyarsu ta dawowa gida daga wata ziyarar aiki.
Firaministan Libya, Abdulhamid Dbeibeh, ya tabbatar da mutuwar babban hafsan sojin ƙasar, Laftanar Janar Mohammad al-Haddad, tare da wasu manyan jami’ai, sakamakon hatsarin da ya faru a lokacin dawowarsu daga Ankara. A wani saƙo da ya wallafa a shafinsa na X ranar Talata, Dbeibeh ya bayyana labarin a matsayin mai “cike da jimami da baƙin ciki,” yana mai cewa waɗanda suka rasu sun haɗa da hafsan rundunar sojan ƙasa, shugaban masana’antar kayayyakin soji, wani babban mai ba da shawara, da kuma mai ɗaukar hoto na ofishin yaɗa labarai.
Ya ce wannan babban rashi ne ga Libya da rundunonin sojinta, yana mai jaddada cewa ƙasar ta rasa mutane da suka yi wa ƙasa hidima da gaskiya da ƙwazo, tare da miƙa ta’aziyya ga iyalansu da al’ummar Libya baki ɗaya. A nasa ɓangaren, Ministan Cikin Gida na Turkiyya, Ali Yerlikaya, ya ce an rasa sadarwa da jirgin ne jim kaɗan bayan tashinsa daga filin jirgin Esenboga na Ankara, inda daga bisani aka gano ɓaraguzansa a gundumar Haymana da ke kudancin Ankara.
Yerlikaya ya ce jirgin haya na nau’in Falcon 50 mai lambar rajista 9H-DFJ ya tashi da misalin ƙarfe 8:10 na dare zuwa Tripoli, kafin a katse sadarwa da shi da misalin ƙarfe 8:52 na yamma, bayan da ya turo saƙon saukar gaggawa.
A cewarsa, fasinjoji biyar ne ke cikin jirgin, ciki har da Laftanar Janar al-Haddad, yayin da rahotanni daga kafafen yaɗa labarai na Turkiyya suka ce an karkatar da wasu jirage daga filin Esenboga a matsayin matakin kariya.
Tun da farko, ma’aikatar tsaron Turkiyya ta bayyana cewa babban hafsan sojin Libya na ziyarar aiki a Ankara a matsayin wani ɓangare na ƙoƙarin ƙarfafa haɗin gwiwar tsaro da soja tsakanin kasashen biyu.
