Gwamnatin China ta fito fili ta nuna rashin jin daɗinta kan cafke Shugaban Venezuela, Nicolas Maduro, tana mai jaddada cewa ba za ta amince da kowace ƙasa da ke ɗaukar kanta a matsayin alƙalin duniya ba.
Ministan Harkokin Wajen China, Wang Yi, ya bayyana cewa Beijing ba ta yarda da duk wata ƙasa da ke ɗaukar rawar ‘yan sanda ko alƙalin duniya ba, bayan cafke Shugaban Venezuela, Nicolas Maduro, da Amurka ta yi. Wang ya faɗi hakan ne yayin ganawarsa da Ministan Harkokin Wajen Pakistan, Ishaq Dar, a birnin Beijing ranar Lahadi.
Ba tare da ambaton Amurka kai tsaye ba, Wang ya yi ishara da “sabbin abubuwan da suka faru a Venezuela,” yana mai cewa ya kamata a kare ‘yancin kai da tsaron kowace ƙasa bisa dokokin kasa da kasa. Wannan ita ce magana ta farko daga Beijing tun bayan bayyanar hotunan Maduro yana ɗaure da ankwa da rufe idanu, lamarin da ya girgiza al’ummar Venezuela.
Maduro, mai shekaru 63, na tsare a wani gidan yari a New York, inda ake sa ran zai bayyana gaban kotu ranar Litinin bisa zargin safarar miyagun ƙwayoyi. Matakin na Amurka ya jefa kalubale ga dangantakar diflomasiyya mai ƙarfi da China da Venezuela suka kulla a 2023, wadda ta kai kusan shekaru 50.
China dai na ƙoƙarin zama babbar ƙasa mai tasiri a harkokin diflomasiyya, musamman bayan nasarar da ta samu wajen sasanta Saudiya da Iran a 2023. Sai dai kalaman Shugaban Amurka Donald Trump na cewa Amurka za ta kula da harkokin Venezuela na ɗan lokaci sun janyo damuwa a Beijing.
Wani jami’in gwamnatin China ya bayyana cewa cafke Maduro ya kasance babban koma baya ga Beijing, wadda ke son a gan ta a matsayin aminiyar ƙasa mai dogaro ga Venezuela. China ta kasance babbar mai tallafa wa tattalin arzikin Venezuela tun bayan tsaurara takunkuman Amurka a 2017, inda ta sayi kayayyaki da darajarsu ta kai kusan dala biliyan 1.6 a shekarar 2024.
