Kamfanin matatar mai na Dangote ya fito fili ya karyata jita-jitar da ke yawo cewa yana shirin rufe matatar sa domin yin gyare-gyare, inda ya bayyana rahotannin a matsayin ƙarya da yaudarar jama’a. A cewar kamfanin, matatar na ci gaba da aiki yadda ya kamata ba tare da wata tangarda ba.
A cikin wata sanarwa da kamfanin ya fitar ranar Litinin, Dangote ya tabbatar da cewa ana ci gaba da samar da man fetur (Premium Motor Spirit – PMS) ba tare da tsaiko ba. Sanarwar ta ce matatar na da ƙarfin samar da lita miliyan 40 zuwa 50 a kowace rana a watannin Janairu da Fabrairu, gwargwadon buƙatar kasuwa.
Kamfanin ya bayyana cewa a ranar 4 ga Janairu, matatar ta samar da lita miliyan 50 na PMS, inda aka fitar da lita miliyan 48, tare da tabbatar da cewa adadin man da ake da shi a halin yanzu zai iya wadatar da ƙasa na tsawon kwanaki 20.
Dangote ya kuma fayyace cewa duk wasu ƙananan gyare-gyare da ake yi a wasu sassan matatar ba za su dakatar da ayyukan samar da mai gaba ɗaya ba. Tun daga ranar 16 ga Disamba 2025, kamfanin ya ce yana samar da tsakanin lita miliyan 31 zuwa 48 na PMS a kullum, daidai da buƙatun kasuwa.
Haka kuma, matatar ta tabbatar da cewa tana ci gaba da sayar da PMS a farashin da bai wuce N699 kan kowace lita ba ga ‘yan kasuwa da masu saye da yawa. Kamfanin ya shawarci jama’a da masu ruwa da tsaki da su yi watsi da rahotannin ƙarya tare da taka tsantsan kan duk wani yunƙurin magudin farashi.
A ƙarshe, Dangote ya jaddada buƙatar dogaro da ingantattun majiyoyi na hukuma wajen samun sahihin bayani.
