Shugaban Amurka Donald Trump ya bayyana cewa gwamnatinsa na nazarin ɗaukar matakai masu tsauri, ciki har da zaɓin soja, kan yadda hukumomin Iran ke murkushe zanga-zangar jama’a da ta girgiza mulkin malamai tun bayan juyin juya halin 1979.
Trump ya ce Amurka na iya ganawa da jami’an Iran domin tattaunawa kan shirinta na nukiliya, amma ya gargaɗi Tehran cewa Amurka za ta iya ɗaukar mataki idan jami’an tsaro suka ci gaba da amfani da ƙarfi kan masu zanga-zanga. “Iran ta kira don tattaunawa, amma muna duba manyan zaɓuɓɓuka,” in ji Trump.
A nasa bangaren, Ministan Harkokin Wajen Iran, Abbas Araqchi, ya ce ƙasar “a shirye take da yaƙi amma kuma a shirye take da tattaunawa,” yana mai jaddada cewa halin da ake ciki yana ƙarƙashin iko. Majalisar dokokin Iran ta yi barazanar kai hari kan sansanonin Amurka da Isra’ila idan aka kai wa Iran hari.
Rahotanni daga ƙungiyoyin kare haƙƙin bil’adama sun ce daruruwan mutane sun mutu yayin zanga-zangar, yayin da dubban mutane aka kama, duk da cewa gwamnati ba ta fitar da adadi a hukumance ba. A halin yanzu, Iran ta zargi Amurka da Isra’ila da tayar da tarzoma, tare da kira ga zanga-zangar goyon bayan gwamnati a faɗin ƙasar.
