Ma’aikatar Harkokin Wajen Amurka ta bayyana jin daɗinta da goyon bayan da shugabancin Falasdinu ya nuna ga shirin zaman lafiya na Shugaba Donald Trump mai maki 20 kan rikicin Gaza, tana mai jaddada cewa Washington na da ƙudirin kawo ƙarshen yaƙi da kuma tabbatar da zaman lafiya a Gabas ta Tsakiya.
Ofishin Harkokin Gabas ta Tsakiya na Amurka ya ce a wata sanarwa da ya wallafa a kafar X cewa yana maraba da matakin shugabancin Falasdinu na goyon bayan shirin, tare da ƙarfafa ƙoƙarin da ake yi na aiwatar da shirin tsagaita wuta da sake gina Gaza.
Jakadan musamman na Trump, Steve Witkoff, ya sanar da fara mataki na biyu na yarjejeniyar tsagaita wuta, inda za a mai da hankali kan kwance damarar makamai, kafa gwamnatin ƙwararru da kuma sake gina yankin.
Mataimakin Shugaban Falasdinu, Hussein al-Sheikh, ya ce shugabancin ƙasar na goyon bayan aiwatar da shirin Trump da kuma kudurin Majalisar Ɗinkin Duniya mai lamba 2803, wanda ya haɗa da kafa Majalisar Zaman Lafiya da hukumominta na zartarwa.
Tun daga watan Oktoba 2023, Isra’ila ta kashe fiye da Falasdinawa 70,000 a Gaza, yayin da tsagaita wuta mai rauni ke ci gaba na tsawon watanni uku. Mataki na farko na shirin ya haɗa da musayar fursunonin Falasdinu da ‘yan Isra’ila da aka yi garkuwa da su.
