Kungiyar Trade Union Congress (TUC) ta bayyana goyon bayanta ga yajin aikin da Kungiyar Ma’aikatan Lafiya ta Ƙasa (JOHESU) ke yi, tare da yin barazanar ɗaukar matakin yajin aiki a faɗin Najeriya idan gwamnatin tarayya ta ci gaba da dakatar da albashin mambobin ƙungiyar.
JOHESU, wadda ke ƙarƙashin TUC, ta umarci mambobinta da su ci gaba da yajin aikin da suka fara a ranar 15 ga Nuwamba, 2025, duk da umarnin da gwamnatin tarayya ta bayar na aiwatar da tsarin “ba aiki, ba biya”. Wannan mataki ya biyo bayan taron gaggawa na shugabannin ƙungiyar a ranar Litinin, 12 ga Janairu, bayan cikar wa’adin ƙarin sa’o’i 72 da aka bai wa gwamnati.
A martaninta, TUC ta zargi gwamnatin tarayya da ƙoƙarin tsoratar da ma’aikatan lafiya ba tare da la’akari da matsin tattalin arziki da suke fuskanta ba. Ta kuma yi watsi da wata sanarwa da Ma’aikatar Lafiya da Jin Daɗin Jama’a ta Tarayya ta fitar, wadda ke umartar aiwatar da tsarin “no work, no pay” da kuma dakatar da albashin mambobin JOHESU ta hanyar IPPIS daga watan Janairu, 2026.
A cikin wata sanarwa da Shugaban TUC, Festus Osifo, da Sakatare Janar, N.A. Toro, suka sanya wa hannu, ƙungiyar ta bayyana matakin a matsayin abin da ba za a amince da shi ba, tana mai cewa yana rushe tattaunawar da ke gudana tsakanin gwamnati da ƙungiyoyin ma’aikatan lafiya.
TUC ta ce tsayar da albashin ma’aikatan lafiya zai ƙara tsananta wahalar rayuwa a daidai lokacin da hauhawar farashi, ƙarin farashin mai da sauran matsalolin tattalin arziki ke addabar ma’aikata. Ta jaddada cewa amfani da IPPIS domin hukunta ma’aikata wata hanya ce ta danniya da cin zarafin ikon gwamnati.
Kungiyar ta buƙaci a janye sanarwar nan take ba tare da sharaɗi ba, a dawo da duk albashin da aka dakatar, tare da komawa teburin tattaunawa cikin kwanaki bakwai. Ta yi gargaɗin cewa idan aka gaza cika waɗannan buƙatu, za ta tashi tsaye domin shirya yajin aiki na haɗin gwiwa a sassa daban-daban na ƙasar.
