Majalisar Dattawan Nijeriya ta bukaci Ma’aikatar Lafiya da Jin Daɗin Al’umma ta ƙasa da ta ƙirƙiro tare da aiwatar da ka’idoji na ƙasa da ke wajabta ajiye mafi ƙarancin adadin magungunan ceto rai da na gaggawa a asibitocin gwamnati da masu zaman kansu. Kiran ya zo ne kwanaki uku bayan rasuwar mawakiya Ifunanya Nwangene sakamakon cizon maciji.
Matakin ya biyo bayan amincewa da kudurin da Sanata Adebule Idiat Oluranti ta gabatar, inda ta jaddada karuwar gaggawar lafiya a Nijeriya—kamar cizon maciji, cizon kunama, guba, da wuce gona da iri na magunguna—tare da bukatar gwamnati ta tabbatar da wadatar magungunan ceto rai a duk faɗin ƙasar. Majalisar ta bayyana mutuwar Nwangene a matsayin abin tausayi da kuma abin kaucewa, tana mai cewa ya fallasa gibi a shirye-shiryen gaggawa da samuwar magunguna.
A cikin shawarwarinta, Majalisar ta bukaci hukumomin kula da lafiya su sanya ajiye muhimman antidotes a matsayin sharadi na lasisi da sabunta izinin asibitoci masu zaman kansu, tare da tanadin kasafin kuɗi da ingantaccen tsarin samarwa ga asibitocin gwamnati. Haka kuma, ta umurci Ma’aikatar Yada Labarai da Hukumar Wayar da Kai ta Ƙasa (NOA) su kaddamar da kamfen na wayar da kai kan muhimmancin gaggauta zuwa asibiti bayan cizo ko guba.
Ifunanya Nwangene, wadda aka fi sani da Nanyah, ta rasu a Abuja bayan ta samu cizon maciji. Rahotanni sun ce ta nemi agajin gaggawa a asibitoci biyu, amma ta fuskanci jinkiri saboda zargin rashin maganin anti-venom—zargin da ya ƙara tayar da muhawara kan shiri da samuwar magungunan gaggawa.
