Saudiyya ta sanar da cewa ta karɓi baƙuncin wani taron ƙasa da ƙasa a birnin Riyadh domin kammala shirye-shiryen kafa wani ƙawancen ƙasashe na tsaron teku da zai kare zirga-zirgar jiragen ruwa a Tekun Bahar Maliya da Mashigar Bab al-Mandeb, yayin da ƙasashe 14 suka bayyana goyon bayansu ga wannan shiri.
A cikin wata sanarwa, Ma’aikatar Tsaron Saudiyya ta ce taron da aka gudanar ranar Alhamis ya samu halartar hafsoshin hafsoshin soji da wakilai daga ƙasashe 43, tare da wakilai daga Tarayyar Turai (EU), inda suka tattauna hanyoyin ƙarfafa tsaron hanyoyin jiragen ruwa na ƙasa da ƙasa da kuma fuskantar barazanar da ke addabar kasuwanci da zirga-zirgar teku.
Ƙasashen da suka sanya hannu kan sanarwar haɗin gwiwar sun haɗa da Saudiyya, Kuwait, Bahrain, Qatar, Jordan, Masar, Pakistan, Turkiyya, Djibouti, Somaliya, Bangladesh, Yemen da Comoros.
Ma’aikatar ta ce har yanzu ƙofar a buɗe take ga sauran ƙasashen da ke son shiga ƙawancen.
Taron ya tattauna batutuwan da suka shafi ƙarin barazanar tsaron teku, ciki har da kare jiragen kasuwanci, tankokin ɗaukar mai da muhimman kayayyakin more rayuwa na teku.
Haka kuma an duba kundin tsarin ƙawancen, tsarin shugabanci da yadda ayyukansa za su gudana.
A cewar Saudiyya, mahalarta taron sun cim ma matsaya kan kammala matakan kafa ƙawancen, wanda zai share fagen fara aikinsa nan gaba.
Wannan mataki na zuwa ne yayin da ake ci gaba da samun ƙarin barazana ga zirga-zirgar jiragen ruwa a Tekun Bahar Maliya, bayan da ƙungiyar Houthi ta Yemen ta ayyana abin da ta kira takunkumin ruwa kan Saudiyya a ranar 20 ga Yuli, tare da ɗaukar alhakin kai hare-hare kan wasu jiragen ruwa masu alaƙa da Saudiyya.
Saudiyya ta sha alwashin kare zirga-zirgar jiragen ruwa da kuma mayar da martani ga duk wata barazana da za ta shafi harkokin sufurin ruwa na ƙasa da ƙasa.
